Varða

Endurtek það sem ég sagði fyrr í dag :)

Fellið gæti heitið Hrunafell

Varða

Hvað með nafnið Varða? Það er fallegt, tengist Fimmvörðuhálsi og er táknrænt...

Fimmvörðufjall?

Jólakveðja

Nú er vetur, náttar fljótt, 

nú eru að koma jólin

Á  nýju ári mun þó skjótt

hækka á lofti sólin.

Ný ást!

Ég fann nýja ást sem ég verð að deila með ykkur... veit samt að hún er ekki allra

Anyways... nýja ástin mín er alls ekki ný og þó ég hafi vitað af henni í mörg ár þá var ég að kynnast henni fyrst í gærkvöldi. Ég og eiginmaðurinn vorum að keyra heim úr jólagleði í gærkvöldi þegar allt í einu heyrðust tónar í útvarpinu sem fengu okkur bæði til að snarþagna. Ég hækkaði í útvarpinu og við sögðum varla orð þar til síðustu tónarnir dóu út og auglýsingastefið á rás 2 tók við.

Þegar heim kom var náttúrulega farið strax á netið og textinn gúgglaður til að finna út hvaða snilld þetta var. Þegar ég svo loks fann dýrðina var tilfinningin eins og ég hefði verið að finna mynd af manneskju sem ég hafði séð hundrað sinnum úti á götu, svo oft að mér hefur fundist að ég ætti að heilsa henni, en án þess þó að þekkja hana.

Ég skellti nafninu auðvitað í youtube og vissi að þetta var ást sem á eftir að endast.

Hér er lagið sem ég heyrði í bílnum:

 

Í dag...

...fékk ég spurningu um hvort ég væri svolítið löt að blogga. Ég sagði bara eins og er að ég hef ekki nennt því upp á síðkastið, en kannski ég taki upp á því að nýju. Kannski.

 

Allavega, ég var á skrautskriftarnámskeiði hjá Jens Guð, þeim mæta bloggara og skrautskriftarkennara. Þetta er í annað skipti sem ég fer á námskeið hjá honum, og það verður að segjast að það er ekki síðra í seinna skiptið... jafnvel bara betra.

Ég er búin að dútla við skrautskrift síðan ég var ábyggilega 10 ára. Búin að læra nokkrar leturgerðir, en hef alltaf hermt eftir forskriftarbókum en vantað upp á tæknina hjá mér.  Á þessum námskeiðum nær maður nefnilega góðri tækni.

Annars erum við litla fjölskyldan að fara í mat til Ernu á eftir, hlakka til að sjá hvað hún ætlar að tilraunast á okkur...

Meira seinna... kannski!

Finnst fólki það enn undarlegt

að menn vildu takmarka aðgang á tjaldstæðin? Sem betur fer bý ég það ofarlega í bænum að stærstur hluti skarkalans fór framhjá mér. En það eru engar ýkjur að á svona dögum heldur maður sig helst heima.

Erfið nótt á Akureyri

Þetta er grátlegt

Þessar ofsóknir á hendur bahá'íunum í Íran vekja óhug hjá trúsystkinum um allan heim. Það er ekki svo mörg ár síðan fólk var tekið af lífi fyrir það eitt að vilja ekki afneita trú sinni, nú bið ég þess að slíkt fari ekki að endurtaka sig. 

Þann 18. júní 1983 voru 10 konur teknar af lífi í Shiraz, Íran af Islömsku klerkastéttinni. Það eina sem þær þurftu að gera til að bjarga lífi sínu var að afneita trú sinni. Eftir langan tíma í fangavist þar sem þær sættu pyntingum og yfirheyrslum voru þær hengdar, ein í einu og hinar látnar horfa á. Sú yngsta sem var tekin af lífi var 17 ára - Mona Mahmudnizhad. Á þessu ári hefði Mona orðið 43 ára. Síðan 1884 hafa yfir 20.000 manns verið teknir af lífi fyrir það eitt að vera Bahá'íar. Sá síðasti (sem ég veit um) var tekinn af lífi árið 1998.

 

Sex bahá'í leiðtogar handteknir í Íran

Framkoma og framsetning

Ég hef svolítið verið að spá í framkomu og framsetningu síðustu vikurnar. Afhverju er það að maður tekur ósjálfrátt mark á sumu fólki um leið og það opnar munninn, en aðrir verða þess valdandi að maður fer ósjálfrátt að hugsa um hvað sé til í ísskápnum heima og hvort maður þurfi að koma við í búð á leiðinni heim?

Framkoma og framsetning er galdurinn. Þetta er kannski ekki ný eða merkileg uppgötvun hjá mér, allavega kannski ekki fyrir almenning, en þetta skiptir máli fyrir mig. Undanfarið hef ég verið að tjá mig á spjallvef, undir nafnleynd eða nikki. Fyrst um sinn hafði ég hægt um mig og gerði það sem ég geri vanalega þegar ég er í stórum hópi af fólki - segi lítið og hlusta þeim mun meira. Mér fannst það góð æfing að tjá mig á blogg, en sumir hlutir í mínu lífi eru þess eðlis að mig langar ekki til að deila þeim með neinum nema mínum nánustu.

Þess vegna finnst mér gott að geta tjáð mig undir nafnleynd á umræddum spjallvef. Ég hef verið að æfa mig í því að setja fram mínar skoðanir og vera óhrædd við að fá á mig gagnrýni. Þessi hræðsla mín við gagnrýni, að vera álitin vitlaus,  hefur litað svolítið mína persónu. En ég veit að ég hef ýmislegt fram að færa. Ég er ekki að segja að ég sé eitthvað gáfuð, heldur hef ég margt til málanna að leggja.

Með þessum æfingum mínum hefur mér tekist að fanga athygli sumra sem eru virkir á þessu spjalli, athygli á þann hátt að ég er búin að eignast nokkra net-vini. Ég er búin að setja mitt mark á vefinn, allavega í sumum  umræðum.

Næsta skref er að æfa sig í að hafa skoðanir utan net-heima, þó þær kannski stangist á við skoðanir almennings. Ég verð að sætta mig við að ég á ekki eftir að fá alla til að vera sammála mér, og það er ekkert hræðilegt við það. Ég er ekkert verri manneskja fyrir vikið þó mér takist ekki að gera öllum til hæfis.

 

Og hana  nú! 

Mynd

Vinur minn til margra ára hefur veriði að koma reglulega í heimsókn og höfum við verið að vinna að málverki í sameiningu. Hann er búinn að vera að rissa upp sama andlitið síðan ég kynntist honum, loksins er hún orðin að málverki :D

Ps. Vonandi fáið þið ekki aulahroll

Scrappið mitt

Jæja, var að setja inn fullt af myndum á svæðið mitt hjá www.scrapbook.com. Hvernig líst ykkur á?